Day 3 : Singapore Zoo @ Ah Meng Restaurant 早餐-> Singapore Zoo (Rainforest Kidzworld)-> Raffles Quay MTR
-> Merlion Park -> 老百剎熟食中心Lau Pa Sat
Raffles Quay 地鐵站可以講係四通不達, 出口真係有N咁多個, 所以真係要睇清楚邊個出口先好繼續行. 其實嚟新加坡既遊客如果係第一次嚟都會去Merlion Park, 就好似唔到Merlion Park就無去過新加坡咁, 所以我地都唔例外.
跟住指示一出地面就係河邊, 左邊就係Boat Quay, 而右邊就係Cavenagh bridge, 有唔少係新加坡取景既電視戲都曾經會係呢度拍攝, 所以唔怪之得好似熟口熟面呢.
呢幾日係新加坡行街時都奇怪點解仲未見到新加坡出名既雪糕三文治, 就係呢個時候, 雪糕三文治就係眼前出現啦. S$1.2一磚仲要有咁多款, 真係樣樣都想試呀.
雪糕伯伯就將舊雪糕磚用兩塊威化餅夾住就成為新加坡出名既雪糕三文治.
陶寶B一見有雪糕食當然唔執輸, 佢自己都要食一件呀. 雖然天氣好熱, 不過件雪糕磚真係夠晒冰凍, 唔會食到成手都係溶化既雪糕.
河邊仲有啲好得意既展品, 好攪笑, 陶寶B走去摸人Pat Pat!
黃昏時份嚟呢度會舒服好多, 因為沿住河邊行都係無遮蔽位架, 行了大概8分鐘就到了Merlion Park了.
嚟到呢度好多人都會做呢個pose, 為既就係影出呢張低能相, 我地一家三口當然又齊齊做呀.
陶寶B呢幾日係新加坡玩得好開心, 所以影相都笑晒口呀!
唔經唔覺影吓相又玩吓原來已經係6:30pm, 唔怪之得陶寶B不繼嗌肚餓啦, 我地今晚開飯既地方就係老百剎熟食中心(Lau Pa Sat), 由Merlion Park行去大約要20分鐘. 遠遠見到老百剎既外表就知佢有番咁上下歷史.
老百剎位處於金融商業區被高高既商業大廈包圍, 真係有好強烈既對比. 而入面都好古色古香, 真係非一般既Food Court.
入面food court既選擇真係包羅萬有, 而老百剎最出名就食串燒, 所以我地就坐了係室外. 周圍係商業大廈林立包圍住食大排檔, 真係別有一翻風味呀.
老百剎都算得上係遊客多, 但都有好多本地人食, 所以價錢都好大眾化, 串燒都係S$0.7一串, 所以見到好多外國人都會叫好多串加埋啤酒一齊食真係好爽吓.
雖然我地2大1小, 不過見到有咁多款式既食店, 又係樣樣都想食, 所以最後又係叫到成檯都係. 好啦起動.
我地唔客氣啦. 可能因為今日中午無食lunch, 所有我地3人好似餓鬼出寵, 最後居然可以KO晒所有食物, 真係難以至信呀.
其實新加坡真係一個好乾淨既地方, 試想一想一個有多年既歷史既food center, 如果係香港應該會係地下濕淋淋又會好污糟, 但老百剎一啲都睇唔到污糟呢樣嘢, 最勁既係晚上既串燒店仲要開晒檔口及檯係金融區既馬路中心, 試想想如果係污糟邋遢的話, 新加坡政府都唔會俾啲檔口晚晚係條街度開檔啦, 香港就真係諗都唔駛諗.
No comments:
Post a Comment