[澳門驚喜]謝菲嗲哋3日2夜生日大快樂 (酒店住宿篇)

2016/9/2

今年謝菲嗲哋既生日終於輪到係星期五了, 所以貪玩既莎拉媽媽又閃了去玩既念頭. 不過因為陶寶B既幼稚園已開學了, 一開學就請假實在好似有啲過意唔去, 所以最多只可以玩3日2夜喔. 想起謝菲提過好多次好想去澳門玩水, 不過C9上身既莎拉真係覺得好貴唔捨得, 所以一直都遲遲未實行, 好啦, 終於有機會有個借口了, “為老公慶祝”呢個原因仲唔係大晒?!

所以莎拉就靜靜雞Book好酒店買定船票. 而莎拉就事前一直叫謝菲請定大假, 仲同佢講當日生日去海洋公園呢, 直到出發前一晚佢先被通知去澳門過生日之餘, 佢仲估唔到係去玩3日2夜呢,我地一家3口都係”夏日玩水控”, 3日2夜就可以大玩特玩了. 中午放工後莎拉就立即飛奔去上環碼頭與陶寶B滙合出發去澳門了. 

今次係為”天浪淘園”而來, 所以就訂了銀河酒店(Galaxy Macau), 之前多次嚟澳門都從未踏足過銀河, 而銀河酒店集團真係好大.

 因為其下有6間酒店相連, 所以就連大堂都大到不得之了. 

一踏入酒店門口就有職員熱心地上前問是否check-in, 之後就帶到去check-in區坐住等候.

唔駛5分鐘就到莎拉check in, 而check-in就用咗差不多10分鐘才完成, 好彩係坐住嚟check-in呢.

Check-in後就當然立即上房啦, 陶寶B第一時間就急不及待衝咗入去. 嘩, 間房好大好闊落.

最正係個浴室, 大大塊既玻璃與房間分隔. 

另外相比起好多酒店, 房間既照明係較光較明亮. 雖然今次book既房間不是泳池景觀, 但係城市景觀都好開陽, 對住官也街那邊.

而房內既小食及飲品都係免費享用1次, 哈哈哈, 平時入住酒店時, 所有snack及飲品掂都唔敢掂, 今次就唔同了, 隨便食隨便飲. 

另外發現枕頭太軟會瞓得唔舒服, 所以就打電話去front desk要求硬身枕頭, 估唔到酒店硬身枕頭都有兩款(乳膠枕及簥麥枕)給客人選擇, 唔使10分鐘, room service就送了枕頭嚟, 真係好高效率. 當晚出街食完飯後返回房間, 就發現酒店已經送了個生日蛋糕來.

(莎拉係check-in時要求咗個生日蛋糕作慶祝), 打開嚟睇一睇先, 嘩,,,係opera蛋糕, 真係成個birthday cake送, 絕對唔係好cheap既一小件. 

一家人唱生日歌食蛋糕係最幸福的事, 今次選擇了Galaxy hotel真係最正確的決定喔, 下一篇再分享重點節目"天浪淘園".

陶寶b與莎拉媽