“宿營”呢兩個字對莎拉嚟講已經係上世紀既事了, 那些年一大班朋友仔會相約攪宿營夜晚唔願瞓覺既日子真係好好玩. 時至今日居然又再可以嚟宿營, 真係無得頂呀. 今次一行10人book了西貢青協戶外訓練營嚟一個”那些年宿營”.
西貢青協戶外訓練營既房分了多種類型, 新的舊的都有, 而我地今次book既就係12人特選客房($1680/晚), 但因為規定不可男女同住, 所以就book了2間. 但其實如果人數夠多, 就可以book 28人複式客房, 咁就可以唔需分兩間屋了. 我地準時3pm就check in 攞房, 嘩,,,,間房好大好靚, 落地大玻璃加個埋個景真係無得輸呀!!!
我地咁多人企係個客廳影相都好闊落呀.
聽朋友講28人複式客房仲靚呀, 可捨我地唔夠人. 而個洗手間一共有3個shower, 2個toilet都好乾淨企理.
而房間就係上下隔床, 同樣非常整齊乾淨的.
比較以前年青時既宿營房間, 呢個絕對可以叫做豪宅吧. 有晒Sofa, 檯, 冷氣及電視, 基本需要齊晒, 美中不足係沒有雪櫃, 所以要自己帶冰袋或cooler嚟雪飲品.
坐係客廳, 望住個海真係咩都唔想做呀.
營地依山而建, 所以其本上所有房間都係正宗既背山面海.
如果夏天嚟仲可以游水, 玩獨木舟等等活動. 除此之外, 營內還有多項歷奇活動, 當日就見到多個團體玩歷奇活動呢.
陶寶B自己就不斷地玩吹泡泡及竹青蜒自娛一翻.
話明那些年, 當然要影番張貼題相啦.
最High最開心一定非陶寶B莫屬, 睇佢個Pose就知啦.
時間仲早, 就近近地行去烈事紀念碑, 由青協行去唔洗10分鐘當飯前運動都好. 係呢啲咁嚴肅既地方, 本應係應該正經少少, 但點知陶寶B居然係當行Catwalk咁不停擺pose, 搞到我地都忍唔住笑.
行返去青協時間剛剛好6PM, 我地訂了的BBQ都可以開始燒, BBQ場是要預早BOOK定及需要訂佢地既食物才可以使用, 今次就訂了個12位的經濟BBQ餐, 估唔到都好大推頭. 本身呢度係唔可以自己帶食物嚟燒的, 不過我地都偷雞買咗少少海鮮嚟, Shuuuu,,唔好話俾人知呀.
莎拉非常欣賞呢個BBQ爐既設計, 坐位附設有張小小既檯可以放食物, 真係好細心呀, 如果出面郊遊公園既BBQ爐設計都係咁就Very good啦.
不過呢度BBQ有時間限制, 時間只係6PM-9PM, 一到9PM就有啲姐姐出嚟清場要你走, 所以BBQ真係要捉緊時間, 我地當日都燒唔晒啲食物呀. 有其他營友好醒, 自己帶個煎PAN嚟係尾段時間煎嘢食加快速度, 所以下次記得要帶個煎PAN嚟呀.
食飽晒就個個都唔想郁, 齊齊係度睇電視.
回到房中第一件事就同陶寶B沖涼先, 跟手暗佢快快瞓覺, 哈哈哈, 一瞓落床唔夠3分鐘就瞓著了, 正呀!!!
因為大人們既重點環節就而家先開始, 宿營又點唔可以成班朋友素顏玩UNO呀!!! 大家玩到唔願瞓, 最後終於玩到700分嚟決定輸贏, HAHA!!!
陶寶B第二朝8:30AM就起咗身, 查實莎拉仲好眼瞓, 不過陶寶B就一於唔理咁多, 佢用佢既方法去玩UNO (分顏色)!
查實訓練營內都有餐廳提供中西式食物, 朋友就一早食咗個早餐, 價錢及賣相都可接受.
對住呢個無敵大海景真係唔捨得走呀, 下次再見啦!
出翻西貢就嚟個瘋狂飲茶, 吹住海風食點心又唔錯呀! 我地好似餓鬼, 足足食咗26碟點心先收心呀!
時間過得真係快, 今次宿營時間太短了, 玩到唔夠喉, 下次要玩多晚加玩水先得呀!
No comments:
Post a Comment