其實呢3日2夜, 大部份時間都係玩水渡日, 本來都安排了一些其他活動, 但室外活動除了玩水, 其他真係太熱了, 所以最後就只剩下一個重點活動”澳門科學館”. 上一次去澳門科學館已經是差不多一年前, 而陶寶B一直都記得澳門科學館既3樓展館有得玩扮建築工人, 所以今次就特別安排再嚟一次順便睇恐龍展覽.
買好門票加3D movie門票後, 就立即去了3樓先, 可惜今日係星期日, 所以” 扮建築工人”既遊戲需要排隊攞定下一場既號碼. 既然要等就不如玩住其他展館先.
陶寶B去到其他展館玩時就好似一隻停唔到既馬騮咁, 影既相真係十張有九張都走焦既, 要佢定定地影吓相真係有難道, 想佢定定地, 只有玩火車時才會出現.
呢個玩Skateboard機非常好玩, 同玩街機一樣咁好玩.
事隔一年再嚟玩, 發現有唔少展品都係壞了, 希望當局可以快快維修好, 唔好愈來愈差就好了.
咁多個互動遊戲, 陶寶B最鍾意就係玩揸車, 佢其實唔識揸就只係識撞.
上之嚟既時候都未識砌自己個名, 今年就終於都識了, 叻叻豬!
終於都等到夠鍾有得玩啦, 陶寶B一日望到黑都係想玩呢一Part呀, 今次就有勞嗲哋陪陶寶B入去癲了.
可惜今日真係太多人了, 想再玩多一次又要再排, 唯有下次再嚟玩過啦.
講咗咁耐都唔見個恐龍展館既?!原來係2號展館.
其實陶寶B都未係好明每種恐龍既特色(查實莎拉都唔係太清楚), 不過科學館安排了一啲小朋友係每隻恐龍前為參觀者講解, 眼見有啲小朋友最細既都只係6,7年歲, 佢地好專業講解得好好, 莎拉覺得科學館既安排真係好, 又可訓練參加既小朋友口才及膽識. 不過陶寶B聽完都唔係好明, 唯有叫佢扮吓恐龍啦.
最後就去咗睇恐龍3D電影, 今次係陶寶B第一次睇3D電影, 戴住副眼鏡好奇怪呢.
至於套電影就真係麻麻地, 因為佢3D既技術係N年前那種, 睇得好唔舒服個種3D, 好彩套電影只係45分鐘咋, 所以無下次呢. 玩完睇完就係時候講Bye bye啦, 下次再玩.
除咗日間去科學館玩, 夜晚就去遊走氹仔酒店, 因為銀河酒店有條路氹專線既Shuttle bus連接各大氹仔酒店, 所以就去吓上年才開既新濠影滙行吓, 其實澳門每一間酒店都好大, 係新濠影滙行一個圈都用了30分鐘, 真係非常好既運動.
雖然新濠影滙有個”華納滿 Fun童樂園”, 不過價錢都唔平, 所以今次都無打算玩了. 新濠影滙既主題係電影, 所以係商場內都放咗好多美國電影既英雄公仔.
商場內有間糖果店, 真係唔買都入去睇吓.
不過最後又點會唔夾番啲五顏六色糖走呢?!
行完新濠影滙就轉去新濠天地, 印象中新濠天地好似係氹仔最早發展既酒店, 唔知係咪因為呢個原因, 所以酒店既設施及配套都唔夠其他新開既酒店咁好, 不過小朋友行過路過都可以玩吓呢啲互動電玩遊戲, 而酒店內既商場現正翻新中, 所以都無咩好行了.
係新濠天地酒店後面就剛剛係新開幕既永利酒店, 最搶眼就當然係酒店前既音樂噴水池了.
至於佢個纜車就,,, 不敢恭維了, 價錢要$100/位都不在話下, 路線只係由地面環繞噴水池坐去酒店2樓, 真係無聊到極點, 真係好想知有咩有人會俾錢坐呢, 唔使錢就無所謂, 要錢就無可能, well, 真係好想知永利酒店個纜車最後既下場會點. 遊走完幾間酒店後就可以坐翻shuttle bus返酒店了.
No comments:
Post a Comment