快打上海小吃- 上海香港麵家

星期六, 同謝菲出戰銅鑼灣尋找我地想搵既超大掛牆多格相框, 但最後都係失望空手而回, 搵唔到都要醫吓肚啦!!

因為太肚餓啦, 所以就那那聲搵嘢食. 每次去到銅鑼灣, 都心思思想去食渣甸街既"文輝墨魚丸大王", 但係門口實在太多人啦, 我又實在餓到肚都孿, 於是就轉移去佢對面果間"上海香港麵家"啦!!

其實呢間啲粢飯係好出名, 而之前都試過外賣佢啲粢飯呀, 真係好好食, 但就未有試過佢其他嘢食啦.

今次我地叫咗咸粢飯, 生煎包鍋貼雙拼, 豬扒担担麵及凍豆漿.

嘩,,,個粢飯熱辣辣, 好好味呀!!!!!埋面啲油炸鬼, 肉鬆, 炸菜及糯米既份量比例啱啱好呀! 加埋杯唔係好甜既冰凍豆漿, 簡直係令人回味呀!!!

個生煎包同鍋貼就普普通通啦, 無咩特別.

而個豬扒担担麵都唔錯, 啲豬扒外脆內juicy, 不過就咸咗少少, 但係同個担担麵一齊食就味道就剛剛好啦, 不過唔知係咪幼麵既關係, 啲麵越食就越"林"呀!

同場加映, 食飽咸既嘢, 就要食番啲甜哈Balance吓, heehee, milk top既牛奶味及黑芝麻味雪糕, 食完好開心!