2012/07/11

廣華生B記(下)

入到去手術室, 四周既環境好冷冰冰, 莎拉瞓係手術床上, 只係望到頂上既手術燈及牆上既電子鍾. 醫生就問莎拉知唔知今次做咩手術, 之後就係莎拉身上駁上不同既儀器.

期間聽到啲手術用具互相碰撞既金屬聲音, 望住天花既手術燈, 加上姑娘再重提一次剖腹生產既風險, 問莎拉清唔清楚既時候, 莎拉既心就一直好驚, 雙腳係不由自主咁震緊. 可能姑娘見莎拉係咁係度震, 所以就問莎拉點解要開刀, 之後姑娘就話唔駛擔心, 佢之前生BB都同莎拉一樣催生後子宮口開唔到, 所以姑娘就安慰莎拉唔好緊張!

是次剖腹生產係用半身麻醉, 係脊椎之間打麻醉藥, 胸口對下就會進入麻醉狀態. 因為要係脊椎之間打麻醉藥, 所以莎拉要打側身及屈曲全身, 麻醉師會係每做一個動作之前同莎拉講嚟緊會做啲咩. 雖然麻醉師只係在背脊上查碘酒消毒, 可能莎拉真係好緊張, 雖然明知只係消毒, 但係一掂到個背脊, 就成個人震一震, 莎拉穩約記得麻醉師好似係脊椎之間打咗3次麻醉藥, 係脊椎之間打麻醉藥既感覺真係怪怪咁, 有些微既刺痛及赤痛既感覺.

落咗麻醉藥後, 大約幾分鍾之後就開始feel唔到子宮既陣痛, 係呢個時候成個人真係舒服晒, 因為痛咗咁耐, 而家一下子無晒痛楚, 成個人好似鬆晒. 之後麻醉科醫生就同莎拉做測試, 睇吓啲麻醉藥是否已經開始生效. 首先麻醉科醫生會叫莎拉嘗試提高隻腳, 當然啦, 呢個時候藥力已開始生效, 雙腳已經沒有力提起, 之後麻醉科醫生再用一支好似噴槍既物體係莎拉既手臂位噴一噴, 莎拉feel到係啲好強既凍風, 之後醫生再係雙腳及腹部位置噴一噴, 但係就只會感覺到好似有陣風, 不過就已經感覺唔到冷凍! 最後麻醉科醫生會問有否唔舒服, 唔知係咪麻醉藥既關係, 當落藥後, 莎拉係feel到好似想嘔吐, 但都只係維持咗十數秒, 之後想嘔既感覺已經消失.

Confirm麻醉藥已生效之後, 姑娘就開始係莎拉胸口位置用布擋住下身既視線, 之後就係手臂/肩膀位置吹啲暖風, 所以胸口對上既位置做手術期間係暖暖地.

一切準備就緒, 醫生就開始手術啦, 大約好似二十分鐘後, 就感覺到醫生好似係咁"挫"係咁"搖"我個下半身, 呢個動作大約維持咗有成1-2分鐘, 姑娘就係我身旁話醫生攞緊BB出嚟, 無幾耐, 就聴見手術室內幾個人同時叫出當時既時間, 跟住就聽到BB喊咗兩聲,  呢一刻真係好感動及好實在, 因為陶寶B終於出世啦, 莎拉都不其然流眼淚啦. 之後醫生就係上面遞BB過嚟, 叫莎拉睇吓係囝囝定囡囡. 當時只係見到眼前有一團灰灰及濕漉漉既嘢, 真係要定一定神先見到陶寶B既"古古"呢.

再過咗十多分鐘, 姑娘就將已經抹乾淨及包好既陶寶B遞給莎拉睇, 陶寶B開眼望咗莎拉兩眼, 莎拉錫咗陶寶B一啖之後, 姑娘就抱咗陶寶B出去給謝菲見一見, 之後陶寶B就送咗去兒料病房作觀察(雖然陶寶B超過5磅, 但係因為屬於早產加上不知有否感染, 所以要送去兒料病房)

醫生縫完針之後, 整個手術就完成, 之後就留係手術室大約30分鐘作觀察, 係呢個時候, 莎拉已經好攰好眼瞓啦, 因為足足20小時未真正入睡, 所以係手術室內不知不覺已經瞓咗.

完成呢30分鐘既Observation後, 都已經係差唔多1:00am, 之後莎拉就被推去產後病房, 而謝菲就已經係出面走廊等莎拉陪入產後病房. 完成好過床之後, 謝菲就攞番成個走佬袋幫莎拉set好晒個"架部", 謝菲陪咗莎拉一陣之後, 姑娘就要佢走啦, 不過好彩產後病房可以用手提電話, 所以都仲可以同謝菲傾一陣電話先瞓.

而莎拉都慢慢開始feel到下身有感覺, 麻醉藥開始慢慢退, 初頭莎拉都仲可以瞓到, 但2小時後, 莎拉就開始痛醒咗, 仲要成個人痛到不其然咁發震, 今次真係知道咩叫痛到震. 但係因為啲麻醉藥未完全退晒, 所以未可以打止痛針. 痛咗都唔知有幾耐, 姑娘終於嚟同莎拉打止痛針, 打完之後莎拉就瞓著啦.

到咗第二日(25/6)7:00am, 就有個嬸嬸嚟幫莎拉手面及清潔, 之後就有醫生巡房啦, 當醫生按未完全收縮既子宮時, 真係成個人都酸軟. 手術後既24小時都唔可以落床, 所以唔可以去兒科睇陶寶B, 唯有等謝菲用相機去影陶寶B俾莎拉睇呢.

雖然唔可以落床, 但就已經可以飲水及食流質食物, 醫院既流質餐真係極級流質, 唔可以講好難食, 但對於一個餓鬼病人成30小時都未食過嘢, 呢碗粥都已經唔錯架啦.


過咗24小時後(26/6), 莎拉終於可以落床啦, 第一吓用力, 真係好痛, 痛到入心入肺, 由床行去洗手間既路, 只係短短二十幾步既距離, 而家用咗差唔多成5分鐘先至可以"欄"到去, 一路行就一路傷口好痛, 就算每次上落床都會令到傷口位置好痛, 雖然有止痛藥食, 但都係會痛呢.

而落床後第一件事想做既就係去睇吓陶寶B, 所以就算幾痛都好, 莎拉點都要落去兒科病房. 一路痛一路行, 最後用咗15分鐘先行到去兒科病房(其實只係9/F去8/F)見陶寶B.

新生嬰兒病房每日都有幾個時間俾留院既媽咪可以入去餵奶, 莎拉第一次真正見清楚陶寶B及抱住陶寶B既呢一刻真係好感動及好實在, 眼淚就不由自主流出嚟, 因為眼前呢個BB就係莎拉同謝菲既Baby boy!!! 莎拉嘗試餵人奶, 但係陶寶B都唔食, 不過莎拉知道頭幾次一定係咁, 所以沒有氣餒!

呢一張就係莎拉係兒科病房影既第一張一家三口全家幅.


而經過2日係兒科既觀察及Testing, 陶寶B一切健康正常(YEAH!!!!!). 今晚9:00PM仲會將陶寶B上嚟俾送番莎拉自己照顧, 不過因為莎拉未上奶, 所以暫時餵唔到人奶, 因此當晚暫時交俾育嬰室照顧一晚.

27/6, 呢日早上經醫生檢查後, 莎拉可以中午後就同陶寶B出院回家啦. 而係出院前, 育嬰室會教媽媽們點樣餵奶及換片片, 而當日會出院既媽媽們, 醫院會安排姑娘講解出院後既需知及之後如何登記健康院等等問題. 而因為莎拉係開刀既關係, 所以之後會有社康姑娘上門跟進(洗傷口及拆線), 真係估唔到而家既follow up咁好.

總括嚟講, 莎拉覺得廣華醫院既姑娘及嬸嬸都好好人, 而醫生係就係Cool啲, 不過都沒有好求其既情況. 就係咁完成咗莎拉呢4日3夜畢生難忘既廣華生B之旅啦!!!

21 comments:

  1. sandychan09027/11/2012 12:01 PM

    恭喜你正式成為mami啦.^^BB好可愛呀...剖腹身子要注意多d..
    期待同你分享湊B心得..^^
    [版主回覆07/15/2012 13:44:36]多謝呀!! 遲啲大定Share吓啲bb經呢.

    ReplyDelete
  2. 聽你形容都覺得好感動呀, 媽媽真係好偉大!
    [版主回覆07/15/2012 13:47:18]而家已經做咗媽媽, 先真正體會到媽媽既偉大呢.

    ReplyDelete
  3. 做人媽媽的確一點都不簡單, 睇完我都覺得好感動!
    [版主回覆07/15/2012 13:48:17]而家已經做咗媽媽, 先真正體會到媽媽既偉大呢.

    ReplyDelete
  4. 媽媽真係偉大,男士們永遠唔會明白我地嘅感動同驚。。。
    你做得好好呀!叻叻!
    Lovely BB~~陶寶B一啲都唔似早產B,其實可能佢已經足月,因為我地都係用LMP計預產品期,有可能唔準,anyway而家見到佢健康就最緊要!!!
    [版主回覆07/15/2012 13:54:10]Gen媽媽, 我絕對認同呀, 男士真係無法體會到生bb既過程呢!!! 而家見到陶寶B健康都好開心, 當初係醫院未生佢出嚟既時候, 真係好驚佢健康唔好呢.

    ReplyDelete
  5. 母愛真偉大......我唔知自己見到BB時,會否一樣會流淚呢!?
    [版主回覆07/15/2012 13:55:44]嘉路, 我相信你到時見到BB都會流淚呢, 因為經過10個月既懷孕, 終於見到BB出世, 真係好開心, 呢啲係Tear of joy!!!

    ReplyDelete
  6. 媽媽真偉大!祝bb健康快樂,莎拉坐月要小心身體啊!
    [版主回覆07/15/2012 14:00:12]艾利絲, 多謝你既祝福呢, 而家莎拉都乖乖係屋企座月呢

    ReplyDelete
  7. 好感動..母親真係好偉大呀!
    聽見你講的痛真係令我心都跟埋你痛呀,你好叻呀...
    祝願你同bb都健康快樂呀....^^
    [版主回覆07/15/2012 14:00:41]Fanny, 多謝你呀, 而家自己做咗媽媽, 先真正體會到媽媽既偉大呢!!!

    ReplyDelete
  8. 小豬碧碧7/11/2012 7:20 PM

    睇到手術室那一part. 真緊張
    不過我都想知點解bb出世時. 會灰灰地
    [版主回覆07/15/2012 14:03:02]係手術室真係氣氛緊張好多架, 真係好難會唔驚呢. 我諗因為BB係羊水浸咗咁耐, 所以先會灰灰地呢

    ReplyDelete
  9. 好少見到媽咪寫開刀既情況, 邊睇邊感動!

    我個tarebaby 就算39w3d 出世, 都唔夠6磅 , 可能我最後幾個星期都冇唔太吸收, 冇咩點重... 大家都要努力呀!!!
    [版主回覆07/15/2012 14:12:58]呢個開刀經歷真係好難忘呢, 所以真係好想去記低佢呀!!!
    Tarebaby有6磅都唔錯呀, 唔洗擔心呀, BB食得到奶, 就好快吸收, 會追到大隊, 所以大家要努力, 加油!!!!

    ReplyDelete
  10. 生仔真順產同開刀都又痛又驚。怯........>.< 希望陶寶 B 健健康康乖乖地長大!
    [版主回覆07/15/2012 14:15:27]其實順產同開刀, 真係兩樣都好痛, 不過始終都係順產會Recover得好好多, 不過真係要睇bb合唔合作, 唔係自己想順產就順產呢.

    ReplyDelete
  11. 真係睇到眼濕濕, 好感動啊 ~~
    再要恭喜你多次 ~~
    [版主回覆07/15/2012 14:16:11]柑柑, 多謝你呀, 成為媽媽真係一啲都唔易呢.

    ReplyDelete
  12. 莎拉媽媽好偉大呀!!
    我終於都見到陶寶B CONGRATS~~
    [版主回覆07/15/2012 14:16:59]多謝你呀, 圓圓!!! 自己而家已經做咗媽媽, 先真正體會到媽媽既偉大呢.

    ReplyDelete
  13. 李太.大頭蝦7/12/2012 11:23 AM

    我見到張全家福即刻眼濕濕,吾知點解?
    辛苦你拉!媽媽
    [版主回覆07/15/2012 14:18:47]李太, 到時你見到自己既bb時, 都一定會好感動架!!!!

    ReplyDelete
  14. 陳太,早安!7/12/2012 5:40 PM

    辛苦你了!^^
    [版主回覆07/15/2012 14:18:36]陳太, 只要bb健康, 真係再辛苦啲都無所謂

    ReplyDelete
  15. 睇完你的生產實錄, 成個腦都係"痛痛痛同痛到震"...................做媽媽真係偉大呀!!!
    [版主回覆07/15/2012 14:19:43]我自己一諗起, 都係得一個字---->"痛", 所以自己而家已經做咗媽媽, 先真正體會到媽媽既偉大呢

    ReplyDelete
  16. 睇完好感動呀,辛苦你喇!!
    [版主回覆07/15/2012 14:21:57]Bird Bird, 自己而家已經做咗媽媽, 先真正體會到媽媽既偉大呢, 所以真係要多啲錫媽媽呢

    ReplyDelete
  17. 真係好感動, 辛苦哂呢!
    [版主回覆07/15/2012 14:22:52]Leona, 媽媽既偉大, 真係要自己成為媽媽先真係體會到呢,

    ReplyDelete
  18. 莎拉好叻呀!
    我住左五日四夜…陣痛實在太難忘!加油呀!!
    [版主回覆07/20/2012 10:56:55]其實我叫做試過陣痛, 又試咗開刀, 如果俾我揀, 真係會選擇開刀, 因為起碼痛都有止痛藥食呀. 今次生完之後, 真係都唔知仲會唔會生啦,,WAKAKA!!!!
    [JOCI回覆07/18/2012 18:41:39]係呀, 我順產呀......................真係勁勁勁痛.............
    我O係待產房O個時, 痛到唔知自己做咩, 淨係勁吸"笑"氣......為求吸到自己冇知覺....哈哈~~~
    我同我老公講, 下胎一定要去私家開刀我囉.....如果唔係我唔生.....
    [版主回覆07/18/2012 17:35:37]你住咗5日4夜呀?! 係咪順產呀?! 雖然我唔係陣痛到極點, 但係我都已經覺得好痛啦. 成為媽媽, 大家都要加油努力呀!!!!

    ReplyDelete
  19. 首先睇你既blog,,好感動,,母愛真係好偉大..要多d休息呀
    [版主回覆07/21/2012 10:21:09]Thanks ah!!! 而家自己做咗媽咪先體會到"母愛偉大"呢句說話呢.

    ReplyDelete
  20. 貓咪小女俠7/29/2012 5:41 PM

    睇完你的生仔經歷, 我真係有d驚~
    [版主回覆08/07/2012 14:42:21]唔駛驚呢, 到時著到埋嚟就自然會捱過架啦, 呢啲係"媽媽力量"呀!!!

    ReplyDelete
  21. 睇到我喊左tim~~~~真係好偉大~~~~~媽媽為左bb 真係可以變得好強
    [版主回覆08/07/2012 14:43:05]因為"媽媽力量"真係無限架, 真係咩都可以做得出呢

    ReplyDelete