屬於我們的情人節晚餐

與謝菲一起已經多年了, 初初拍拖那幾年都會陸重其事出街食飯慶祝一番, 但自從有了自己屋企後就覺得正日情人節出去食飯, 就有如任人宰割, 平時明明都係同一樣食物, 但情人節既價錢就費了足足3-4成(sorry, 莎拉太清醒了, 又C9上身), 所以今年一如以往一早同謝菲講明不用Book位食晚飯了, 莎拉會安排一個屬於我們的情人節晚餐! 

當然係屋企煮情人節晚餐好似沒有什麼特別又唔多浪漫, 所以莎拉就整了個屬於我們的情人節餐牌, 真係獨一無二架, 有了呢張DIY Menu, 真係零捨不同了, 花小小心思當堂茶餐廳都變酒店貨呀. 

在家煮一個3-Courses meal其實唔難, 不過難就係難在3道菜既烹煮時間安排, 因為一來情人節當日要返工, 回家後就只有1小時預備晚餐, 另一個原因係烹調時間既安排, 因為無理由食完頭盤之後, 自己又走返入廚房煮到成身油煙架, 所以頭盤及主菜都需要煮好後用焗爐仔保溫, 而甜品就需要前一晚整好. 好啦, 諗了幾天終於敲定了我們的情人節晚餐! 頭盤就有美式蟹餅配沙律.

主菜就係香煎銀雪魚配本菇意粉.

最後甜品就係oreo木糠布甸, 簡單又好味!

其實今晚既個情人節晚餐唔係table of 2, 而係table of 3, 咪漏咗陶寶B先得架. 成個情人節晚餐食完都未必知為咩慶祝, 但一見到個蛋糕, 陶寶B又以為自己生日啦. 每次一見到蛋糕, 眼就發晒光啦. 

食完個蛋糕後, 點知居然仲有禮物呢, 一起那麼多年, 其實每次有什麼節或生日, 都不一定會送禮物了, 因為互相已有共識不會為買禮物而買了. 但今年謝菲送的不是什麼貴重的東西, 雖然只是幾包保健食物及一隻保溫杯, 但內藏既心意係無限, 因為謝菲就係見莎拉成日面青口唇白又懶整, 所以就特登買來每晚焗定紅棗杞子圓肉茶, 等第二天可以帶返公司飲, 感謝老公呢一份心意呢, XOXO