戲院初體驗

2015/7/1 

踏入三歲後, 首次帶陶寶B入戲院睇戲, 莎拉就揀了迷李兵團Minions作為陶寶B人生第一套戲. 不過"迷李兵團"大部份既戲院都係上映3D版本, 如果要陶寶B戴住幅3D眼鏡睇相信有難道, 所以莎拉就要揀2D版之餘仲要係中文配音, 可惜上映2D中文版的戲院真係少之有少呀, 最後要去到九龍灣既E-Max睇戲. 

準時入到戲院坐定定………3分鐘後, 就係度叫"媽咪我要走走!!", 不出莎拉所料, 陶寶B未開場就嗌走, 所以有此一著, 莎拉一早已準備了秘密武器---------橙汁. 

秘密武器一出, 誰與爭風, 陶寶B立即又乖乖坐翻底等開場啦. 當戲院既燈熄晒後, 銀幕就出現大大既畫面, 加埋強勁音響時, 張座椅會震盪既呢一切對陶寶B都好新奇刺激. 當陶寶B聽到其他小朋友笑時佢都會跟住笑, 而睇戲期間莎拉都有偷望過陶寶B, 呢位小朋友全神貫注睇戲之餘, 仲學埋大人的動態, 睇睇吓戲又會攞起支橙汁啜一啜, 極度Enjoy! 

睇到中段時, 陶寶B突然講"媽咪濕濕", OH NO,,,,唔係瀨WEE WEE呀?! 因為飲咁大支橙汁, 真係怕陶寶B睇戲睇得太投入而唔記得去痾Weewee. 好彩, 摸一摸原來只係倒湓橙汁咋, 真係一額汗呀. 不過虚驚一場之後, 都係那那聲帶佢去痾wee wee先啦. 

話咁快90分鐘既電影就輕輕鬆鬆睇完啦, 整體嚟講陶寶B今次既戲院初體驗係成功既, 不過下次再有機會睇戲, 相信預備俾陶寶B既果汁要細樽些先得.