2015/07/18
荔園呢一個名字係莎拉媽媽及謝菲嗲哋童年回憶既一部份, 雖然印象有些模糊, 但係印象最深既都係荔園既叮叮船及宋城, 莎拉有不少既童年相都係在荔園內影架. 估唔到N年後既今天居然有個期間限定版既荔園出現, 可以俾莎拉同謝菲嚟個集體回憶之餘, 仲可以同陶寶B分享自己兒時所玩過既叮叮船, 為陶寶B締造出一個佢既荔園童年回憶.
星期六早上襯天氣無咁熱就起行入荔園玩啦, 早上入場既人真係唔多, 園內基本上所有機動遊戲都不用排隊.
園內都不是太大, 好似比起上次AIA既場地細少少.
換了Token及歡樂卡(用來買嘢食, 用剩可以退錢)後, 就選定我們第一個機動遊戲啦. 上之AIA沒有玩到小木馬, 今次就補翻啦, 小朋友加大人陪玩多謝6個Token($60).
玩小木馬就當然首選座木馬啦, 但係點知抱了陶寶B坐上木馬後, 陶寶B立即變臉爆喊, 陶寶B驚驚爆喊真係好耐都無見過呢.
既然驚驚就唯有走去轉坐馬車啦. 當機動遊戲開動之後就無再喊啦, 真係笑死莎拉, 因為平時擔大包天既陶寶B居然會被一隻小木馬而嚇到喊真係始料不及呀.
場內除了有機動遊戲之外, 仲有好多童年時既卡通人物, 莎拉童年其中一個至愛就係小忌廉啦, "星空裡萬物在轉, 歷憶萬年~~~~"
除咗有小忌廉, 仲有男仔好鐘意既小露寶, 不過呢個卡通人物莎拉就無咩印象啦.
下一個重點機動遊戲就係叮叮船了, 1.1米以下既小朋友一定要大人陪同, 所以雖然大人大大舊都陪小朋友座船仔呀. 叮叮船既旋轉速度其實真係好慢好慢, 不過唔緊要, 因為船上既叮叮先係重點, 陶寶B仲不斷係度打個叮叮, 相信每個小朋友最鐘意都係咁玩.
場中央位置就係溜冰場, 雖然沒有玩, 不過座上去隻老虎型溜冰座滑器過吓引都好呀.
係場內有架迷你小火車, 陶寶B一見到就不斷話要玩, 好啦, 等你如願意償啦.
陶寶B由細到大都好鐘意玩車仔, 今次有得扮司機揸車車不知幾開心呀.
玩咗都已經成個鍾啦, 係時間食吓飲吓休息吓啦. 天氣炎熱最好就莫過於飲個紅豆沙冰呀, 因為真係無得輸.
荔園內除了有機動遊戲之外, 攤位遊戲都好經典架. 要數最eye catching就一定係大象天奴既掟蕉遊戲.
望落好似好容易掟得中, 其實好難架, 玩咗4個token都唔中呢, 其實大象天奴唔係食蕉係食錢至真呀.
呢個就係恐龍屋啦, 開幕初期有人抱住小朋友一齊Sir滑梯而受傷既遊戲啦.
因為陶寶B仲未夠高玩, 所以就係恐龍腳下影吓相就算吧.
另外一個最多人玩既就係經典掟階磚, 玩了2個token換回2排好久不見的綠箭香口膠喔.
玩後感: 雖然荔園既遊戲與上次既AIA嘉年華真係無得比, 因為荔園既機動遊戲真係好Old School, 不過荔園主打既就係回憶而不是刺激, 同埋其實荔園係不用入場費的, 所以不失為一個好去處喔.
No comments:
Post a Comment