3人世界親子澳門遊 (中)

好啦經過了第一晚較為浪漫既活動之後, 第二日就180度大轉變, 今日就嚟個抵玩親子三大玩意.

第一站 – 人造滑草場

地點: 大潭山郊野公園 (近氹仔機場)

費用: $0 (免費)

無錯你無眼花, 呢個人造滑草場係費用全免, 仲要係任玩, 仲要係大人細路都玩得好開心, 呢個係莎拉既頭號推介. 唔好以為郊野公園就一定好遠, 其實就係機場附近, 機場行上去都只係大約10-15分鐘. 輕輕鬆鬆酒店出發可以搭來往機場既免費穿梭巴士, 之後就上機場1樓既離境大堂, 之後就過馬路去對面既中國大酒店.

搭升降機上7 樓, 出了酒店Lobby後, 就斜路左轉(上山方向), 之後就會見到係路邊斜坡有間"中國民族館".

之後就行入去穿過民族館出另一邊出口, 行上樓梯

之後轉左沿住木材路繼續行上山.

大約行5分鐘就會見到"大潭山郊野公園".

 再行前少少就會見到人造滑草場既牌架啦. 

當日早上11am去到都係得2個人玩, 人造滑草場入口處就已經放了8個滑草兜.

莎拉同陶寶B懷住興奮既心情一齊玩(因陶寶B仲細, 怕佢一個人玩會反兜, 所以就2人一兜一齊Sir).

 嘩,,, 真係好快好好玩呀, 唔好話小朋友啦, 就算呢我呢個牛龜咁大個玩都玩得超開心呀.

 係費用全免既條件下, 真係可以玩到你唔玩呀. 當玩了差不多1小時後, 就開始見到多啲人呢, 而係呢個時候就有個管理員叔叔出嚟維持秩序, 小朋友排隊輪住玩. 

就係咁我地就係呢度玩咗2小時啦, 因為實在太好玩, 玩到唔捨得走. (睇Video就知有幾快有幾好玩) 

溫馨提示, 人造滑草場係逢星期一休息架.

第二站 – 小朋友電動車車

地點: 燒灰爐公園 (近西灣湖, 遠望澳門旅遊塔)

費用: $5/15分鐘

呢個公園其實係極之唔起眼, 如果唔係上網Search都唔知原來公園仔內有個迷你街道, 小朋友可以學吓交通安全, 都幾認真架.

雖然啲車款及質素就普普通通, 但係$5可以玩15分鐘真係咩都抵, 因為場內只得一個工作人員處理租車事宜, 所以有時玩到過晒鐘都未發現.

因為實在係好抵玩, 所以每次玩完15分鐘後, 問陶寶B仲玩唔玩時, 莎拉就拎$5出嚟再玩, 真係幾咁豪呀, 仲可以試玩其他車款添, HAHAHA!!! 係香港如果有呢啲電動車車起碼要幾十蚊啦, 係呢度就任係玩成個鍾都係$20. 

溫馨提示, 車場好似係每日至6pm

玩完次後仲可以順便行去西灣湖邊(民國大馬路)食葡菜, 有兩間好出名既亞利咖哩屋及美心享利餐廳. 

今日我地就揀咗食亞利咖哩屋, 個咖哩真係好好食, 又平又抵食呀. 食飽叉足電就向下一地方出發啦.