7th month成長之路

體重及身長:

好多人都話陶寶B唔似7個月既BB, 因為望起上嚟, 陶寶B個身好長, 健康院沒有量度陶寶B既身長, 而莎拉都沒有實際度吓, 只係知道陶寶B有啲衫已經係發展到著18M既碼, 所以佢啲衫真係好快唔啱著呢. 而體重就8.03kg, 比起上個月增加咗0.4kg, 改為食一餐粥仔後, 體重都好穩定呢.

轆地墊

儲咗好多陶寶B既相, 有時真係唔知點分類post出嚟, 所以唯有短短地都出篇blog post出嚟啦. 希望唔會悶親大家.

買咗張鬆弛熊既地墊諗住俾陶寶B係地下轆吓玩吓, 初頭就咁用手摸張地墊, 都以為好似ok, 點知返到屋企一攤出嚟用, 覺得好硬, 個面又"鞋", 真係唔多放心俾陶寶B係上面自己碌呀.

 唉~~~真係又一次知道平嘢無好嘢既真理. 不過既然都買咗啦, 都係咁二俾陶寶B係上面玩吓碌吓, 之後就收番埋張地墊啦.

Party must go on

2012/12/24
今年既聖誕節雖然多咗個新成員陶寶B, 但係愛熱鬧既莎拉無有怕, 都照樣係屋企搞番個House party同朋友仔歡度平安夜. 為咗方便啲, 所以大部份既食物都已order到會, 只係留番少部份食物自家製啦. 除咗有食物, 屋企少量既聖誕節佈置一定唔少得呀, 不過今年就無放聖誕樹啦, 因為陶寶B既物品估咗好多位, 地方變得淺窄, 所以少少地既Decoration就算啦.

呢個Wreath已經陪伴莎拉渡過咗第3個聖誕, 雖然當初買既時候覺得有啲貴, 但係都用到第4年啦, 咩都抵翻晒啦.

認識新朋友彭彭B

2013/1/12

莎拉與謝菲既家族之中, 陶寶B係第一個既小BB, 所以唔係太多機會與差不多年齡既小朋友玩. 

2013年既第一個活動就係帶陶寶B同朋友仔既BB交流一吓.

陶寶B:"有得同媽媽出街街識新朋友, 等我型啲先, Chok呀!"
莎拉: " 阿囝, 今次係男仔friend呀, 唔係女仔呀, 唔使咁Chok呢"

外出用booster seat - The First Years

陶寶B每日都會帶去婆婆屋企湊, 而夜晚就帶返自己屋企, 所以雖然陶寶B本身已有一張Richell既餐椅, 但係張椅都係放係婆婆家, 所以當weekend時莎拉家中就沒有booster seat, 餵陶寶B食粥仔比較麻煩. 
所以構思想買多一張可以帶出街用既booster seat, 咁出街就唔使座出面餐廳既high chair, 因為總係覺得啲椅好邋遢, 二來去親戚朋友屋企食飯都方便啲, 等陶寶B可以圍檯座. 做
咗一輪Research之後, 就鎖定兩款booster seat, 分別係The fisrt years及 Yummigo. (兩款都係9month或以上使用)
睇過呢兩款實物, 真係各有各好, 莎拉嘗試作比較.

Yummigo既好處係一個盒形, 打開後可以放物件入去, 而外型又好得意. 不過價錢就貴啲, 約$35X, 而Size就比較大約 12"x11"x5.5", 重359g.

而First year就係自動充氣式, 用之前打開個塞就會自動充氣, 價錢就係$25x, 而size就同yummigo相若, 不過就薄啲, 12"x10"x3"(充氣後約4"), 重250g.

最後莎拉都係揀咗First years, 因為佢薄身啲, 如果唔推bb車出街都可以放張booster seat入奶粉袋, 因yummigo真係比較厚, 除非平時出街都一定會用BB車, 咁可以放係BB車下面個籃都可以, 如果唔係真係無辦法放入奶粉袋呢.

一買咗反去就俾陶寶B試吓座先, 佢座得都OK, 雖然安全帶全三點式設計, 但係因為而家陶寶B未係好完全座直, 佢會有時"中"向前, 所以都係要有人座係旁邊扶一扶穩當啲.

陶寶B上報紙

地鐵個份報紙都市日報(Metro daily)逢星期四既副刊有登一啲BB相, 每個月都有不同主題, 偷得意既莎拉媽媽就submit咗陶寶B張相去參加, 哈哈哈, 點知真係登咗陶寶B張相呢, 雖然張相唔大, 仲要係最細個張相, 但"陶寶B上報紙"呢件事已經令到全家人好開心好興奮啦.

陶寶B自己都睇翻佢上報紙既個一板呢.

莎拉仲留起咗當日既呢一份報紙, 得陶寶B第時大個啲, 自己睇翻無聊媽媽同佢做既好事!!!

又販家了- Fisher price安撫搖搖椅

本來係陶寶B初出世時已考慮過買呢類型既安撫椅, 不過最後都係打消呢個念頭, 因為一來價錢唔平, 二來驚陶寶B唔鐘意座. 但係最後到咗陶寶B成6個月大就走去販家, 點解最後會走去買呢, 而唔早買早享受呢?!  咪就係因為係朋友屋企試座成功, 見陶寶B座得定定地, 好似幾好咁. 二來平時婆婆日頭湊佢時, 陶寶B又未座得定, 成日有要陪住佢座, 行開行埋都唔得, 所以不如買張椅俾佢自己座. 三來好似話2013年好多Fisher Price既Product都會加價. 所以就係N咁多個既耤口下, 莎拉就係2012年最後一日販咗呢張安撫搖搖椅俾陶寶B, 盛惠$68X (係上樓鋪買有額外Discount).
一返到屋企就拿拿聲拆盒, 九秒九裝好張搖搖椅, 第一時間放陶寶B落張椅度嚟個剪綵儀式啦.
一放陶寶B落去扣咗條Seatbelt之後, 佢就起勢係咁彈彈彈, 張椅就係咁搖搖搖, 嘩咁搖法唔得掂呀, 真係驚佢反橷呀, 唯有改為唔可以搖既模式啦.

尋找味道回憶-海景軒

上年既結婚週年紀念dinner, 因為當時莎拉剛有咗, 所以都唔係好食得到嘢, 就算幾好味都唔可以真正enjoy. 今年既anniversary, 莎拉就要好好慶祝吓啦. 當晚婚宴既菜式, 莎拉最深刻既印象就係個葡式焗響螺, 因為真係好好味, 所以好想再食一次.

於是今年既2週年慶祝就去番Intercontinental Grand Stanford Hotel (海景嘉福酒店)既中菜廳"海景軒"食飯.
本身海景軒都係一間幾出名既中菜廳, 除咗因為佢連續多年榮獲美芝蓮星級食肆之外, 仲因為佢地既總廚"梁師傅"係好出名, 每年都有菜色參選而獲獎.

唔知係咪臨近冬至既關係, 本身想book星期六食, 但係full booking, 咁好啦, 不如改為正日(12/18), 點知居然佢地由18至23日都full booking, 真係估佢唔到. 

走遍商場 - 又一城Xmas外影

農曆新年都嚟緊頭, 莎拉而家仲Post緊一個月前既嘢, 真係要努力加油post多啲先得呀!
2012/12/9
仲係放大假, 當然係行街行盡佢啦. 莎拉細個既時候覺得可以同聖誕老人影相就好啦, 以前香港就唔係好流行, 但係在加拿大一到聖誕節, 好多shopping mall都有聖誕老人同小朋友影相, 可惜莎拉都超晒齡都唔好意思搵聖誕老人影相啦. 所以到咗有陶寶B, 莎拉都好想係BB既第一個聖誕節, 可以一齊同聖誕老人影相呢. 莎拉一直記得又一城每一年都有棵好大既聖誕樹同有個外國人扮既聖誕老人, 所以今年一定要去又一城啦.

係又一城俾$60就可以同聖誕老人影相, 仲有個相架連一張即場打印既相添, 而呢$60係做慈善架, 係幫"高錕慈善基金"籌款架, 所以都幾好呀, 可以順便做善事.

嗲哋小時候

原來謝菲小時候都係同樣地咁鍾意玩腳仔, 有相唯証, 兩父子既動作一模一樣, 一擔擔呀!

而個樣睇番, 又唔係真係好似, 不過面圓圓呢樣就似謝菲呀!

Let's meet some gals

2012/12/28
陶寶B自出世後, 今次係第一次去朋友屋企作客. 因為唔係成日同BB出街食飯, 所以出街既安排都要預早考慮定, 例如要就翻BB食奶時間, 推BB車定係用孭帶, 搭咩車路線點走都要諗定先. 今次既路線係要搭地鐵加小巴, 所以都係用孭帶方便啲呀.

去到朋友屋企, 大人就開餐食飯, 陶寶B就定定咁座係張搖搖椅度, 朋友個2歲半既囡囡就招呼陶寶B.
(就係呢一次試座成功, 莎拉以為陶寶B會係呢張搖搖椅座定.)

走遍商場 - 朗豪坊Xmas外影

雖然聖誕已過, 但係仲有好幾編聖誕既post都未出, 要加油出post先得!!!

2012/12/08

謝菲星期六上午要返工, 咁莎拉就第一次單拖孭住陶寶B出去朗豪坊會合謝菲食晏同行街街. 其實平時行商場, 都會盡量用BB車帶陶寶B出街, 但係旺角朗豪坊實在太多人, 推住bb車好唔方便, 加上個商場又好少升降機, 所以都係用孭帶方便啲呢.
雖然只係孭住陶寶B 15分鐘既路程, 不過莎拉雙膊已經好攰啦, 因為陶寶B都已經好重啦(就係因為呢一次, 所以莎拉先會買多一條i-angel孭帶).
到到商場又係搵嘢食先, 不過成個商埸真係超多人, 所以是但搵間有位又有長椅既餐廳就得啦. 莎拉都未order嘢食, 陶寶B就又已經瞓著咗, 哈哈哈, 又係隨街就瞓啦! 不過咁樣都好, 而家叉一叉電, 等陣先唔會扭計.
又係到咗食完既時候, 陶寶B又自己自然瞓醒, 真係合作啦. 郎豪坊既聖誕主題係"極光森林", 用咗好多LED燈整成既樹, 白藍色既主題.

大少爺又一新櫈 - Richell Booster Seat

2012/12/13

莎拉買咗張Bumbo Chair無幾耐, 但係陶寶B座一陣就唔鐘意, 成日發紋憎, 所以莎拉唯有又再換櫈.(好彩呢張係親戚送, 唔係又要再販家)
今次呢張係Richelle既Booster Seat, 陶寶B座咗落去都OK呀, 相比起Bumbo chair闊落好多, 所以陶寶B可以座得舒服啲, 仲座到好似個大少爺咁款!
而家我地大人食飯時就會放陶寶B上high chair, 之後就俾個玩具佢自己玩, 咁我地都有餐安樂茶飯食吓. 到我地食完飯就到陶寶B食糊仔啦.

芝士茄子焗肉醬意粉

2013年第一個post就整篇嘢食, 醒一醒神!
好耐都無post煮嘢食啦, 望一望上一次莎拉廚房既dinner原來已經係2012年既6月, 當時陶寶B都未出世呀, 真係上年既事啦.
不過星期日有時都需要自己煮晚餐, 但都係呢個宗旨"焗嘢一煲過", 方便快靚正. 今次就試吓Marks & Spenser既pasta sauce 整咗個芝士茄子焗肉醬意粉.
 莎拉同謝菲都係鍾意食茄子既人, 將已切薄片既茄子, 輕輕咁煎一煎, 之後鋪放在肉醬意粉上再加啲cheese一齊焗, 超好味呀.