如果每日多幾小時

相信好多媽媽都會覺得, 自從bb出世之後, 每日24小時好似好唔夠用, 點解咁快又夠鐘, 啲時間好唔見洗(其實錢一樣唔見洗!!!), 點解咁快就晚上11pm?!!! 真係每日都同時間比賽咁. 雖然陶寶B已經成功侵入莎拉既生活, 佔領每一日既Leisure Time, 令到莎拉長期欠缺假期及睡眠 但都係值得既.

過往啲私人時間會用作拍拖, 寫blog, 上網, 整嘢食, 煲碟, 瞓覺. 但係而家既生活, 上述既幾樣嘢, 通通都變成limited edition 既luxury item,  所以如果每日有多幾小時就真係好啦. 不過莎拉都知自己諗多咗啦, 雖然時間係有限, 但莎拉都盡量keep住每星期都會寫2-3篇blog, 因為一來想盡量記錄陶寶B既成長, 二來莎拉相信自己如果唔Keep住寫的話, 就會dum懶個人, 拖拖吓就會方廢呢個blog架啦.

9th month成長之路

體重及身高
前兩星期回醫院做檢查, 要陶寶B除光豬嚟磅重, 呢隻光豬仔淨重8.7kg (已經重過一包米啦), 而身高就75cm長. 之前去健康院檢查, 都唔係次次會幫陶寶B度身長, 所以其實莎拉媽媽都唔係好肯定陶寶B幾高, 有時買衫都係估估吓, 今期知道陶寶B既高度, 買衫俾陶寶B都容易揀碼啦.

陶B做運動

"One more two more 蕃薯變菠羅 three more four more 一齊變瘦咗 "
夏天就快到啦, 之前一身收埋既豬肉, 係時候要面對佢啦. 莎拉就搵咗個私家教練同大家一做運動, 有請陶寶B!!!!!

佢會同大家示範3個動作, 第一個就係壓腿操, 呢個動作可以鬆吓腳筋, 記住要好似陶寶B教練咁隻手要盡量掂到腳趾之後要Hold住呀.


第二個動作就係踢腿, 呢個動作可以減吓大脾呢. 陶寶B教練就示範到重點要盡量踢高隻腳呀.

最後既動作就係腿部伸展, 因為做完踢腿操之後一定要releax吓腿部既肌肉架, 記住好似陶教練咁捉住自己既腳hold住一陣之後放鬆就得架啦.


相當大家跟住陶教練做呢三個動作, 大家既腳就會變得靚晒架啦.

東薈城食Lunch buffet - Essence

2013/3/3
呢一排都無咩帶陶寶B行街, 所以就不如一家三口行吓街. 好耐都無去過東薈城啦, 上一次去都差唔多3年多前呢. 記得東薈城內有間Novotel酒店, 好似啲buffet都好抵食咁, 今次星期日既行程就係食buffet+行outlet mall.
陶寶B, 我地準備出發啦!!! 去到邊都要帶住Sophie, 出街時莎拉媽媽一定唔可以執漏架!

莎拉唔係buffet big fans, 特別係lunch buffet, 因為明知食完lunch buffet之後就晚餐都食唔落, 不過東薈城個附近都無咩特別嘢好食呀, 試吓佢既buffet都好呀.

BB發惡夢

陶寶B呢一個月試過2,3次晚上餵完奶放回BB床瞓覺, 約30分鐘之後會突然之間大喊, 仲要係合埋對眼嚟喊, 大滴大滴眼淚. 諗住抱起陶寶B comfort翻佢, 點知陶寶B都仲係合埋眼來喊, 莎拉相信陶寶B應該係發惡夢. 終於用咗2分鐘是可以令陶寶B醒一醒, 不過都係喊晒口, 用奶咀都收唔到聲呢. 最後拿拿聲開少少奶俾陶寶B食, 食完之後就瞓翻啦.

所以莎拉呢兩日就上網搵下BB出現呢個情況既處理方法. 發惡夢主要可能之前玩大太癲或出街時太刺激引起, 而另外有啲媽咪就話可能同BB出牙仔有關. 莎拉都唔知係邊個原因, 因為又同佢出過街玩, 而陶寶B又出緊牙仔喎.

有朋友就話可以俾BB食保嬰丹或七星茶, 不過莎拉覺得保嬰丹好似好中藥成份好重, 所以都係唔敢俾陶寶B食. 至於七星茶呢, 莎拉就最後買咗余X生試一試, 陶寶B試飲過2次, 當晚發惡夢時就開水俾佢飲, 飲完之後就無再發惡夢啦. 其實莎拉都唔夠膽肯定七星茶係咪真係Work, 不過暫時都係非不得意時先會俾陶寶B飲七星茶, 因為始終都有中草成份呀, 唔知其他媽咪Blogger有無咩見意呀?!

敗家無時停: Skip*Hop地墊

話說之前買咗張韓國做既鬆弛熊地墊, 但因為使用時感覺好似好硬, 唔係好放心(後來呢張鬆弛熊地墊放係婆婆度用), 所以莎拉就要買過張啦. 當初因為一來啲公仔pattern還可接受, 二來價錢平, 所以才會買鬆弛熊.
因為要買張放係自己屋企用, 所以今次第二次再買時都真係相信價錢與品質係成正比例既, 於是就target啲大路牌子.
好多媽媽既大熱之選 Dwingular當然質地好, 但係莎拉都謝菲都唔係太鍾意既既公仔, 所以要再搵. 最後搵搵吓就搵到Skip*Hop呢隻美國牌子, 第一眼已經鐘意佢地墊既pattern,因為佢係無公仔, 唔會同家中既設計太過格格不入! 不過都有啲媽咪會覺得用拼圖或既地墊會無咁乾淨, 因為多接口位會藏塵, 而一張過既地墊就少了難清潔既呢個問題. 所以真係有好有唔好呢.
訂咗貨等咗差唔多一月終於有貨攞啦, Yeah!!! 一返屋企, 抺乾淨就同陶寶B嚟個試用儀式啦.係客廳就用砌咗個正方形出嚟,  正方形及圓形有4種不同顏色, 所以可以自由去配搭.

企到啦

2013/02/23

陶寶B之前6個月一直都企唔定, 只係鐘意成日跳跳跳, 隻腳一掂地就起勢咁彈, 成個彈工人咁, 果時仲驚陶寶B去健康院做評估時會Fail添. 但一眨眼到咗8個月, 陶寶B終於識得扶住SOFA企定定, 不過都係企得一陣, 仲要唔係好穩震.

見佢企吓企到擺吓擺吓好好笑, 陶寶B仲識得Dum一兩吓地添.

行街Shopping

*** 題外話, 本來呢篇blog已打好及save, 但唔知yahoo咩事, 一upload相, 打晒既嘢唔見晒, 好彩內容唔多, 如果唔係真係好嬲呀!!Yahoo blog真係愈來愈差, 一係就post出嚟, 其他人見唔到, 一係就有時成個blog唔見咗(真係嚇c, 因莎拉未back up), 再唔係就好似今次咁打咗既嘢唔見咗, 真係好令人失望, 相信唔少blogger都有同感, 但係如果搬blog又好似好大工程, 真係唔知點, 唯有啞忍住先!!! ***

2013/01/13
莎拉又要回一回帶啦, 因為有太多相想Post出嚟, 但又寫唔切, 所以襯有時間就寫啦.
星期日天氣好, 要襯農曆新年前出街買定過年衫先. 陶寶B同媽咪及嗲哋出街, 要著得型啲, 威威呀!!!!

自從有咗條 i-angel之後, 出街真係方便好多, 陶寶B都座得舒服好多, 舒服既程度係可以行行吓街都可以瞓著咗, 不過陶寶B都只係快叉型式瞓覺, 最多都係瞓得30-45分鐘就會醒, 不過都好過佢扭計扭眼瞓呢.

出牙仔

睇啲BB育兒天書, BB會係大約6個月開始出牙仔, 有時係Forum見到有啲BB仲會早到4個月就已經出牙仔呢. 等吓得吓, 終於係前兩個星期發現到陶寶B下顎有白點, 摸落去硬硬地, 應該係出牙仔啦. 所以唔怪之得近來陶寶B勁流口水, 一日起碼用5,6條口水肩呀.

陶寶B不嬲都係小吉既化身, 任何嘢都放入口, 不過可能佢出牙仔, 就算俾牙膠或Sophie佢咬, 佢令願走去咬條鍊或咬個夾, 專係咬啲硬嘢, 有時成個玩具波俾佢, 佢就一口咁刨落去, 阻都阻唔嚟, 俾佢激C啦, 所以唯有多啲清潔玩具啦.

香煎鵝肝多士配黑醋藍莓汁 (附有食譜)

之前一直覺得煎鵝肝呢啲高級嘢會好難整, 但係原來唔係想像中咁難, 只係要花少少心機去煮個醬汁呢. 鵝肝呢啲口感咁heavy既texture最好配啲酸酸地既汁, 食起嚟會無咁肥膩架. 而煎完鵝肝後既煎pan會有頗多既油, 所以可以用嚟炒菇(例如皇子菇)就最好不過, 因為菇類係好吸油既食材, 所以炒起既菇會有陣陣鵝肝既香味架, 用嚟配意粉就perfect呢.

父子情深

陶寶B同謝菲半時點樣溝通架呢? 佢地點樣聯絡感情架呢?! 男人同男人當然要做啲Man啲既嘢啦. 有咩係咁麻甩?!!! 不如試吓剃鬚呢?!
陶寶B: 嗲哋教我剃鬚, 等我可以型啲出去識啲靚姐姐.

至於玩個方面, 騎膊馬就一定要試吓啦 (莎拉媽媽唔夠力同你玩!!!)
似乎陶寶B就玩得好心, 不過謝菲嗲哋就好似好辛苦咁呢, 當然啦, 陶寶B佢係咁扯佢啲頭髮!!!!