走遍商場 - Heritage 1881 Xmas外影

2012/12/07去得海港城, 就當然順便去埋Heritage 1881.
係廣場中間有隻超大既bear bear熊可以排隊影相. 都係因為平日既關係, 都係得小貓三四人排隊, 好快就影到啦. 果度仲有個secure姐姐可以幫你揸機影相呢. 哈哈哈, 又一張全家幅呢, 不過都影得陶寶B個樣唔多清楚!

6th month 成長之路

體重及身長:
6個月又返健康院打針啦, 所以可以除晒衫光脫脫上磅,  陶寶B既體重係7.63kg(16.8磅), 身長速度正常, 係生長線上既中位數, 所以陶寶B係中碼BB呀, 如果佢當時足月出世的話, 陶寶B就係大碼BB啦. 而家抱佢真係好重呢, 所以莎拉已經忍唔住係上個月買咗個Hipseat carrier減輕負荷呀.

走遍商場 - 海港城Xmas外影

2012/12/07

仲有幾日大假, 但公司唔可以carry over去下一年(過份!!!), 一定要放咗佢, 所以莎拉就放咗幾日假.
難得weekday放假, 可以帶吓陶寶B去尖沙咀啦. 因為假期星期六日, 尖沙咀實在太多人啦, 唔好話帶住陶寶B, 就算自己大人行街都怕怕呀, 加上如果推BB車實在係太唔方便啦. 今次去尖沙咀既目標係影海港城既聖誕裝飾及去玩具反斗城.
今次係陶寶B第二次搭地鐵呀, 仲要係多人既旺角站搭到尖沙咀站呢, 陶寶B全程都好似好緊張, 唔敢周圍郁, 雙手捉實, 眼仔碌碌.

陶寶B gangnam style

近排發現陶寶B瞓係度時勁鐘意自己腳撐撐, 於是就試吓抱起佢睇吓佢點撐, 點知個傻豬仲撐得更加起勁.

我地播gangnam style, 陶寶B仲好似聽到個Beat跟住嚟跳但係個樣就超認真, 真係俾佢笑C.

祝大家聖誕快樂

HoHoHo, Merry Christmas!!!
今年係陶寶B既第一個聖誕節, 佢祝大家有一個開心快樂既聖誕節!!!

食得開心, 玩得快樂, 同家人及朋友過一個暖笠笠既聖誕節!!!

陶寶B織髮代言人

2012/12/10 - Day 170
上兩星期帶陶寶B去攞回鄉卡, 所以就要影番張最新既証件相. 而呢一日係中旅社第一日實施要有証件相既Softcopy, 仲要approve先可以用, 所以無得用番之前影咗既証件相, 唯有帶陶寶B係中旅社附近鋪頭即日再影相啦 (題外話, 呢個所謂証件相連Softcopy既新規則, 真係無謂到極點, 擺明係"涼"水).
哈哈哈, 莎拉俾番謝菲睇上次同今次既証件相, 謝菲話陶寶B好似賣緊織髮及增肥廣告咁, 哈哈哈, 又幾似喎.
陶寶B你可以下次問吓人有無脫髮既煩惱啦!!!

孭帶比拼: combi vs i-angel

話說陶寶B而家日益重手, 抱得耐真係手都痛, 雖然已經有一條Combi既4way孭帶, 但就開始想賣個hipseat, 剛好媽媽會搞團購一款Korea品牌i-angel 既 hipseat+孭帶, 所以最後就買多條孭帶啦, 莎拉兩款用過之後, 同大家share吓用後感.

combi Magical Compact 4 Ways 孭帶:價錢: $10XX(Piago減價時買)

第一次食米糊

2012/11/29 - Day 159
到咗陶寶B 5個月, 莎拉就開始爭扎如唔如俾陶寶B開始食米糊呢?! 因為健康院既指引係六個月先開始食固體, 但係好多人就4至5個月就開始試食固體, 所以都唔知幾時先試食好. 不過最後莎拉都決定係5個月倒就開始俾佢試一試, 因為其實都係想BB學吞嚥食物, 所以食既粉量真係好小. 而莎拉就揀咗Holle呢隻牌子既米糊, 因為一來organic, 二來係無糖.
 開餐前首先要座定定, 唔準走!

布婚紀念日

結婚2週年又稱為"布婚"或"棉布婚"(Calico Wedding/Cotton Wedding), 比起第一年既"紙婚"已經比較厚了.



過去既一年時間過得特別快, 因為有咗陶寶B既出現, 我地既婚姻生活都同樣起咗變化, 因為以往只有兩個人, 每樣事情都會以自己為中心. 但現在有了陶寶B, 可能會以佢出發, 因此已經少了兩個人既拍拖生活.

最新玩具-自己腳仔

自從上次陶寶B座bumbo chair時玩過自己腳仔之後, 佢就開始對自己既一雙腳趾好有興趣啦. 不過佢啲手仔腳仔就仲未好靈活喎, 咁莎拉媽媽就幫幫陶寶B啦. 首先捉住一隻腳仔先啦, 你睇吓我, 我係功夫小子六師弟!!!!

走遍商場 - 圓方Xmas外影

2012/11/18
踏入11月份, 各大商場就已經有聖誕既裝飾啦, 見到啲紅紅綠綠既decoration, 就想同陶寶B出去影吓相啦. 襯星期日就同婆婆, 姨姨去圓方(Element)飲茶, 順便影吓相呀.

自陶寶B出世後, 都未搭過地鐵呀, 呢次就係佢第一次呀, 就獻俾奧運站至九龍站 (哈哈哈, 搭一個站咁大把), 飲完茶就開始我地既重點節目---影相.
婆婆抱住陶寶B笑得幾開心!!!

陶寶B啱啱瞓醒, 所以成個檬檬樣, 加上影相既Decoration附近有好多小朋友, 所以有太多事物分散咗佢既注意力啦.

見到啲咩呀?! 個樣咁驚驚

我地都盡量引佢, 希望佢可以笑吓呢.
 
不過最後大部份既相都係cool樣呀, 陶寶B, 你Cool到好chok呀!

最開心就係影到張莎拉幾滿意既全家幅啦, 又可以曬出嚟放係屋企啦

Bumbo Chair の初體驗

陶寶B係大約係4個月既時候就開始可以係Sofa自己座, 不過當然就唔係好穩震, 所以唔可以座得耐, 自己座一陣就會跣落嚟呀, 於是莎拉就諗起Bumbo Chair.

呢隻Bumbo Chair係陶寶B未出世時就已經留意到, 不過當時太早啦, 未有呢個需要住, 所以就無買呢.  到咗而家有需要時, 就諗起佢啦, 不過Bumbo Chair既價錢都唔平, 加上好多媽媽都話好快就唔啱座, 所以莎拉都struggle咗一陣, 究竟買定唔買好呢?!
最後販家既莎拉都係買咗張俾陶寶B, 因為莎拉有一個好大既藉口, Heehee, 就係因為陶寶B要開始食糊仔啦, 但係因為仲未買High chair, 所以用住張bumbo chair嚟餵食糊仔啦. (販家就販家啦, 多多藉口!!!)
好啦, 陶寶B第一次座落去, 好好奇, 好得意咁呢.

我們的第14個年頭

Dearest B,

每年到年尾時份就係我地既拍拖記念及結婚記念日, 原來呢兩年, 我每到拍拖週年我就會寫執信給你呀, 所以寫呢封信之前, 我就去睇番上人年我寫給你的信呀. 一年既光陰真係好快過去, 而今年仲過得特別快, 因為有我們既陶寶B既出現呀, 你與我既身份, 由男/女朋友, 到老公/老婆, 演變到現在既爸爸/媽媽身份. 呢14年真係好似過得好快, 回想起我們過去的一點一滴, 仲好似唔係好耐之前發生咁, Haha, 但一見到陶寶B, 就立即Remind我們今天所給集成的一個"家".

14年既時光, 當中有苦在其中, 每一次我們都可以安然渡過只因為有"愛"在其中. 同樣呢14年內都有無限既快樂時光.

感謝上天讓我遇上你及愛上你, 成為你的太太,  與你一起有我們的小朋友, 建築成我們的"家"是我的成就.

You complet my life!

Love,
b

嗲哋搖呀搖

陶寶B好多時都會同謝菲嗲哋玩得好開心, 因為謝菲會抱住佢Swing來Swing去, 搞到陶寶B鬼咁開心, Kaka聲笑. 聽到佢既笑聲真係心都甜埋呀!

5th month成長之路

體重及身長:呢個月未有機會上磅, 所以都唔係好知陶寶B呢個月既增長係幾多, 不過莎拉相信應該係在生長線上平均增長. 上個月賣俾陶寶B既衫仔( 9M 既 size), 而家都已經啱啱好啦, 睇嚟莎拉都又有reason去濕平, 係時間出手買定啲12M既衫仔啦!!!!

動物帽仔Show

呢幾日天氣好涷啦, 真係終於感覺到冬天既來臨呢, 而陶寶B既冬日Look都開始出籠啦!
 大家都見到啦, 陶寶B啲頭髮咁少, 好易冷親個頭仔架嗎, 所以莎拉媽媽除咗預備厚褸之外, 都買咗幾頂帽仔俾陶寶B呢.
同大家嚟個動物帽仔Show啦!!!

第一轆: 扮鹿仔帽

Cover Baby拉票大行動

陶寶B人生第一次參加比賽呀!見網上媽媽會都講緊呢個Cover Baby大招募既比賽, 所以莎拉媽媽都參與吓玩吓啦. 希望各位blog友仔幫幫手投吓陶寶B一票啦. (雖然都知此勝出既機會好渺茫, 不過致在參與啦)

不過今次投票有啲麻煩, 唔可以用手提電話Online投, 要用電腦先得.

大家可以click入下面張圖, Click前往投票,  跟住like咗個page先, 之後進入"瀏覽照片"輸入相片編號 "996" , like呀陶寶B, 咁就OK架啦!!
唔該晒各位靚媽及靚姐姐!!!

莎拉慶生日上下篇(下)

星期六莎拉要返工呢, 不過公司既buddy嚟個飲茶慶生, 佢兩位整咗個hand-made 3D生日卡!

哈哈哈, 多謝晒你地呢. 係物資短缺下都整到個3D效果, 陶寶B好似爬出嚟呢.

Wall of Ethan Baby

而家呢個年代想幫BB影相真係話咁而, 唔似以前父母果一代, 需要用菲林相機同BB影相咁勞私動眾, 所以自己細過啲BB相都唔會太多.

基本上莎拉每一日都會同陶寶B影相, 手機既又有, 傻瓜機又有, 單反機都有, 莎拉都無去數究竟影咗幾多張啦, 總之就係好多好多啦. 一直都想將陶寶B既得意相放係屋內, 莎拉又好貪心想放多啲相, 所以就向幅牆埋手, 最後就係Lost&Found埋咗3盒紅黑白Umbra既相框, 可以自由放位貼在牆上.

莎拉慶生日上下篇(上)

2012/11/4係莎拉既生日, 今年既身份已經再由人地太太升級到人地媽媽啦. 因為有陶寶B既關係, 所以慶祝活動都要就一就陶寶B呢. 所以謝菲就安排將啲慶祝分幾日去做呢.

第一擊就係睇Lisa Ono(小野麗莎) Concert, 莎拉同謝雖然唔係啲有音樂文化氣息既人, 但係對Lisa Ono呢位唱Bossa Nova好出名既女爵士樂歌手就有一個特別既情意結, 因為當日婚禮, 莎拉就係選用咗佢其一隻CD作為晚宴既Background music, 所以每次聽到佢既歌, 都會不其然諗起當日既婚禮 (雖然已係2年前既事, 但莎拉依然回味當日既片段).

謝菲爹哋下廚記

基本上一星期, 一至日都會返媽咪屋企食晚飯, 所以而家都好少下廚啦. 難得星期日媽咪約咗朋友唔得閒, 所以星期日夜晚呢餐就要自己搞掂啦. 有阿陶寶B係度, 莎拉想整自整個晚餐都比較難, 所以今次就謝菲出場啦 (其實佢係怕莎拉煮飯時, 陶寶B扭計時佢搞佢唔掂, 所以就不如佢煮呢), 剛好謝菲前兩日係生果日報見到教"白酒煮藍青口", 於是就不如試一試啦. 雖然謝菲唔係成日下廚(以前讀書時反而謝菲煮嘢食多過莎拉呢), 但係煮得好好味呀, 啲Pasta嗦晒啲cream sauce, yummy!!!

我好幫得手之家務篇

我係陶寶B呀，雖然只有4個月大，但係我好幫得手架，人仔細細都識幫爹哋手，有片為証!!!

DIY手印腳印

之前有朋友一早已送咗盒DIY整3D手模腳模既套裝俾莎拉, 所以莎拉同謝菲就係陶寶B三個月大既時候試整, 不過好可惜, 失敗了呀, 盒內兩PACK既模都連續敗北!!!!(真係好佩服自己DIY整到既朋友們)

但係莎拉真係好想留住咁得意既手仔腳仔模樣呢, 但係如果搵人上門整手模腳模又覺得好似太貴, 所以就平平地係玩具豆豆城買咗個整手腳印既Kit.

陶寶B四個月大既一個星期日, 謝菲爹哋就開工努力整呢個手印腳印.加油呀, 我地唔可以再失敗架啦.
 

豪邁睡姿

初出世既陶寶B瞓覺時都好定, 但係3個月大開始, 就發揮佢豪邁既睡姿!!!

睇吓睇吓, 第二朝瞓醒, 打斜瞓已經係濕濕碎啦, 有時直情成個人仔打橫瞓(張床仔又細, 頭仔腳仔頂住晒), 而家早新進步到最勁係掉轉頭瞓, 真係唔明張床咁細, 佢點可以瞓到U-Turn掉頭?!!! 陶寶B身長長, 真係唔知張BB床瞓得幾耐呢!

4th month成長之路

體重及身長:

返健康院打針上磅, 原來已經有6.75kg (14.9磅)啦, 唔怪之得而家抱上手咁重啦, 真係抱10-15分鐘已經唔得掂呀! 而家陶寶B已經追到上去中碼BB既Size啦. (叻叻呀!) 近排襯換季所以順便執吓陶寶B啲衫仔, 嘩!!! 原來已經有成一大袋衫唔啱著啦, 有啲仲係只著過一二次咁大把呢. 上個月都仲係講緊陶寶B開始要著6M既衫, 今個月已經可以開始著9M啦, BB真係大得好快呀!

Trick or Treat!!!

莎拉媽媽又惡搞陶寶B啦!!! 雖然陶寶B仲咁細, 未識Trick or Treat, 但係姨姨買咗件Halloween衫仔俾陶寶B, 當然要應吓節著出嚟, 娛樂一吓我地呢一班大人.

陶寶B既第一個Halloween, 就係呢個"枯顱仔"造型, 得唔得先?!

陽光下的午餐

踏入10月後, 天氣已明顯開始轉涼, 日間已經再唔似之前又焗又熱, 好多時仲天朗氣清, 所以呢啲天氣好適合戶外活動呢. 之前一直都好少帶陶寶B出室外活動, 最多都係晚上行吓公園, 所以親而家天氣咁好, 就帶陶寶B 出嚟日間戶外吓.

星期日就揀咗間係屋企附近既outdoor餐廳同婆婆食個靚brunch!!!

B的背影

莎拉好時都會抱陶寶B, 所以大部份時間都係正面或側面既角度去望陶寶B, 所以佢既背面就比較少見啦!!!!
好多時都係謝菲或婆婆見到佢呢個小人仔既背影好得意, 所以就影低佢俾番莎拉睇呢, heehee, 人仔細細曲起個身好得意呢.

第一反

前兩日, 陶寶B終於都係我地協助之下, 自己第一次反到身啦!!! (天下第一反!!!)

雖然叫做可以反到身, 但係手仔就未夠力撐起成個身, 所以都未算完全成功! 不過佢自從呢一晚可以反到之後, 佢跟住個幾日就好鐘意玩轉身呢. (可以不同角度望吓人)

好多衫衫

姨姨上兩個星期返加拿大玩, 所以莎拉媽媽就預先係Old Navy (Gap既姐妹店)Online Store買咗一大堆形仔衫俾陶寶B, 之後姨姨就可以順手速遞回港啦!!! (C9慳翻運費好開心!), 而舅父就再買咗好多件連身BB衫, 所以今次陶寶B真係收穫豐富呀, 成一大袋新衫仔呀!

陶寶B百日宴

上星期10月1日係陶寶B既100日大日子, 唔經唔範就百日啦, 有時諗番起佢初初出世時既小BB樣, 而家真係大個咗好多啦. 一早已經決定攪百日宴, 因為BB比較大所以容易Handle佢, 同埋自己可以安排吓百日宴既嘢呢.
百日宴主要都係請比較close既親戚, 所以人唔多加埋都係一圍多啲, 但係雖然人少少, 都係都想整少少decoration俾啲氣氛(莎拉又一借口去販家). 因為圍數少酒樓俾既房唔大, 所以整banner或welcome board都唔可以, 於是莎拉就簡簡單單訂咗一束氫氣球, 可以用嚟作背景影相. 上網search咗好多間氣球公司, 最後搵咗間係觀塘工業區(係APM後面)既公司(Mr balloon), 一束baby theme氣球加多一個100日既balloon都係$200, 唔太貴.
Heehee, 好可愛既baby ballon呀.

簡易早餐 - 大咕窿芝蛋治

好耐之前係生果日報見到介紹整呢個芝士蛋三文治, 一直都未有親身試整過, 最近終於都試一試啦.
莎拉幫呢個芝士雞蛋治改咗個名叫"大咕窿芝蛋治", 因為麵包中整咗個大咕窿, 所以就起咗呢個朵呢.
平時整有蛋既三文治都一定要用煎Pan架嗎, 但係呢個三文治只係需要用焗爐焗, 真係方便又易整. 而個賣相又得意, 相信小朋友大人見到都會有驚喜同會鍾意食. 食落當然好味啦, 謝菲鍾意食太陽蛋, 所以焗到剛剛好時, 用手"meet"周邊既麵包點啲蛋汁食, 好yummy架!!!

與Sophie初接觸

呢隻 Sophie the Giraffe,   莎拉媽媽係陶寶B未出世時就已經買定俾佢啦, 諗住到佢大啲啱用時就READY可以用呢.

等呀等, 終於都可以出場用得著啦. 近來陶寶B真係好鍾意食手手, 俾奶咀佢又唔食, 所以就俾佢試吓食Sophie啦.

哈哈哈, 第一次同Sophie見面就咁狠C咁喉琴, 係咁鍚鍚輟輟Sophie, 陶寶B既First Kiss就咁俾咗Sophie!!!!

中秋慶團圓

自從家中有咗個小BB之後, 而家生活上既細節都要協調吓, 盡量要match番陶寶B既Schedule, 要計一計陶寶B幾點食完奶, 咁我地先可以食.

又到中秋節啦, 又係大閘蟹出籠既時候, 莎拉成年無食蟹啦, 係時候會一會啦, 所以就不如係中秋做節時食今年既第一擊大閘蟹啦!!!

莎拉去到九龍城買蟹時, 本來想一人2隻, 但諗諗吓都係唔好啦, 因為陶寶B每晚只會俾15分鐘我地食飯, 15分鐘後就會開始扭計, 所以食2隻大閘蟹應該唔可以慢慢嘆呢, 咁所以最後都係1隻先啦. 今年啲大閘蟹真係比較上年平咗好多呢, 睇怕好快會再encore呀!!!!

其實莎拉每逢過節既晚飯, 都係鐘意在家中食做節dinner多過出街食呢, 因為係家中食飯特別有做節既感覺, 不過就辛苦晒媽咪啦, 雖然有菲傭幫手, 但點都係麻煩多嘢整呢!!!

做節晚飯真係特別豐富, heehee, 雞同燒肉就一定有, 炆冬菇+餓掌就係近來莎拉既"飛佛"!!! 最正就係豉汁蒸鮑魚, 諗起都想食呀!

中秋節快樂

莎拉小時候好鍾意中秋節架(到已家都好鐘意), 有好味既月餅食, 又有好多時令生果, 最緊要係有得落街玩燈籠(即係玩火啦), 加上仲有假放, 所以真係好鍾意呢個人月兩團圓既節日呀.  
今年加入新成員陶寶B, 所以今年既中秋節特別有意義呀! 小朋友過中秋就一定要有燈籠玩(Heehee, 其實係莎拉媽媽想玩陶寶B就真), 不過佢人仔細細, 又未識得玩燈籠, 所以真係好難揀到個啱心水架呢. 剛好陶寶B既姑姐有朋友送咗個好Cutie既白兔燈籠仔比佢, 所以姑姐就俾咗呢個燈籠仔俾陶寶B啦. 因為佢仲未識得拎住, 所以唯有插係架BB車啦, 著咗燈之後, 陶寶B仲會眼仔碌碌望實個燈籠仔.

敗家記 - Reebonz (online store)

座月個一排, 因為成日上網所以留意到一間新加坡公司叫Reebonz既會員制online store. Reebonz係專賣水貨名牌手袋銀包之類既用品, 有啲似香港既Twist, 所以價錢會比正價平.
而Reebonz既消售形式都幾特別, 因為佢每件貨品都係有時限供購買, 好多時都係只放上網2-3日.
另外就係每件貨物都係得好少量, 有時得1-2件, 所以可能會出現想買既心頭好, 睇兩睇, 等兩等, 轉頭已經俾人買咗, 所以係要搶.
不過其實online買嘢, 最擔心就係買到假貨, 所以莎拉都係做吓research睇定啲先. 上網search完一輪, 發現啲人comment因為間公司係新加坡公司, 那邊既法例比較嚴, 所以賣假嘢既機會比較微, 加上莎拉見佢近來係好多時裝雜誌落晒廣告, 仲有就係見有啲網民既售後評價都OK, 所以都可以試一試. 
莎拉呢次既目標就係"奶粉袋", 所以睇咗及等咗一排, 終於見到個啱心水既"奶粉袋"啦, 就係Kate Spade既 tote bag,

因為見佢價錢都唔算太貴, 二來個袋面係膠面可以方便清潔呢. 所以就決定買啦.
俾咗錢後, 第4日就收到速遞Fedex由新加坡送嚟既包裹(ps包郵費架).
嘩, 好大盒呢, 成個大膠袋包實個箱!上面綁咗隻好大既蝴蝶結, 好似拆禮物一樣.

3rd month成長之路

體重及身長:
上次入醫院時上過磅, 所以知道陶寶B而家重5.76kg(12.7磅), 今次就比起上一個月約1磅, 而check番係陶寶B本健康手冊, 佢既體重同樣係生長線上, 進度良好呀! 而佢既身仔就唔知Exactly係幾長, 不過好多衫仔已經開始著唔到啦, 有啲仲要買6m既size先可以fit 到佢既身長呢. 所以而家莎拉媽媽買衫仔俾陶寶B都要買6M以上先得啦!!!

再度生猛

經過幾日既休息食藥, 陶寶B已經回複精靈, 再度生猛啦!!!!

莎拉媽媽見到陶寶B再次頑皮曳曳, 眼仔碌碌就放心晒LU!! 雖然遲啲重要做Testing, 但係暫時可以放下心頭大石呢.

陶寶B病了

莎拉放完產假返工唔夠2星期, 陶寶B就病咗啦!
事原上星期三下午, 婆婆打電話嚟話陶寶B有啲發燒, 用耳探38.5C, 所以就拿拿聲去屋企附近既診所, 去到診所醫生用紅外線探就成39.5C, 而因為陶寶B未夠3個月就發高燒, 所以要轉介去醫院!
婆婆打嚟俾莎拉時, 真係嚇c媽咪同嗲哋, 所以莎拉同謝菲一放工就立即去廣華醫院滙合婆婆同陶寶B.
去到醫院用肛探都有成39c, 所以要入院留醫. 見到陶寶B眼仔同dup晒, 眼腫腫, 連喊都無力, 真係好心痛!
上到病房見醫生, 因為陶寶B係發高燒, 驚佢係腦膜炎, 所以要做脊椎穿刺以便取得腦脊髓液既物質作化驗, 除此之外仲要肺部照x光, 抽血, 驗小便, n咁多個test! 而期間會打對付腦膜炎既抗生素先!
搞完一大輪, 陶寶B就安排瞓在育嬰箱(保溫箱),  陰公豬, 一隻手就種豆豆, 另一隻手就抽血, 一隻脚就駁住儀器監測佢既心跳及血氧量, 媽媽見到都忍唔住喊!!

拳頭好味道

自從陶寶B兩個月大之後, 佢就開始好鐘意食拳頭, 仲要每次都食得好知味, 成日食到"Chap chap"聲.


特別係佢肚仔餓時或者係想瞓覺時, 佢就會食拳頭, 食手手. (唔通食手手可以止肚餓?!!)

所以而家一見佢手拳頭, 就會換個奶咀俾佢, 免得佢慣性食手手呀!